THU MAL MAWI BER CHU

A hmasa-in chhiartu duh tak, i hun hlu tak senga ka thu ziak tlawm tak min chhiarsak avangin ka lawm e.

Mizo ṭawng thu malah hian eng nge mawi i tih ber tiin kan Sir-in vawikhat chu min zawt a, kei chuan “ Sir, keima ngaihdanah chuan Mizo ṭawng thu malah hian tlawmngaihna hi mawi ka ti ber” tiin ka chang a. Kan sir chuan eng vangin nge tiin min zawt a, kei chuan ti hian ka chhang a.

A hmasa-in tlawmngaihna awmzia hi sawi fiah hmasa ila, mi tam tak chuan tlawm duh lohna emaw, tlawm hrehna emaw an ti a. Keima ngaih ve dan chuan ‘tlawmngaihna’ chu phut let nei lo leh hming ṭhat duh vang emaw, mi mit lakna tur ni loa mi dangte tana thil ṭha tih hi a ni. 

Chu tlawmngaihna nun nei tur chuan hman aṭang tawhin kan pi leh pute'n an tu leh fate an fuihna ber pawh a ni. Mi tlawmngai thei tak chu ngaihsan pawh an ngaisang ṭhin hle a, chuti taka tlawmngaihna ngaisang ta na fam chu tlangval leh nulate pawh chu tlawmngaihah an inel ti ila kan sawi sual tam awm lo ve.

Tlangvalin sa kap se, lal hnenah sa chhiah dahin a bâk zawng chu ṭhenawm khawvengte nen an insem dan dan ṭhin a. Sem sem dam dam ei bil thi thi kha an thupui viau a ni. Uikawm deuh lal sa chhiah pawh dah lo va, mahni a pum bilh hmak hmak ṭhinte chu Valupa thu-in Lal pawh rawn lovin Sa ṭah chhuak an pe ṭhin a. Hetiang thu-ah hi chuan Lalin Valupa te thu neihna vawrtawp a pe a ni. 

Sa ṭah chhuak chu tlangval leh valupa te'n sa hrang tlem tê chu thing tuai lian tawk takah phuar betin rit tih hmel taka zawnin chu tlangval uikawm te sum hmunah chuan an nghat ta ṭhin a. Hmanlai chuan tlangval tan ‘pawnfeng feng rawh’ tih lohah chuan mualphothlak tawp a ni.

Hei bakah khaw kar kawng sah te, thlan laih te, mitthi lu men te leh a dang tam takah tlawmngaih an inel suau suau a, an khawltlang pawh a nuam hle ṭhin a ni.

Nulate pawh mitthi lu men te, puan tah te leh a dang tam tak sawi sen lohah te tlawmngaih leh taimâk an chhuah ṭhin a ni. Chuti taka thu mal pawimawh chu tunlai ṭhalaiteah hian hmuh tur a vang ti tâwk an tam hle a.

Mi ṭhenkhat chuan tlawmngaihnain mual min liamsan tawh an ti a. Mahse keia ngaihve dan chuan, tlawmngaihna hi kan pi leh pute'n aṭang kan inro chun, kan thisena bet tlat a nih avang hian zoram hmun tinah hian a kuh mum mek a, chu kuh mumin par a chhuah theihna tur chuan mi mal tinte hi kan pawimawh a ni.

Tûk khat ka nu-in bawnghnute leia mi tir chu kawng sira bike chhe siama lo buai map map patling 1 ka hmu a, a bulah ṭhuin a chhe lai te chu ka zawt a, ka theih ang angin ka pui ve a, rei lo têah chuan mi ṭha hnem tham tak rawn pung khawmin an rawn tihpui luai luai a, a hmuhnawm ka ti kher mai.

Vawikhat leh pawh kan khuaah mitthi a awm a, YMA ka nih ṭan kum a ni a, ka ṭhiante nen kan kal ve a. A hmun ka thlen chuan an lo lai ṭan tawh a, thlan chhungah chuan tumah rei an awm hman lo, i hah tawh ang tiin an duh lo chung te chu an inkai chhuak a, kei pawh rei ka lai hman lo. Hmuh a nuam ka va han ti êm.

Tlawmngaihna a tham ral ka tih mek lai hian, tlawmngaihna kuh mum chu kan hmu lo lui a ni zawk lo maw? Hmun tinah hian tlawmngaihnain bu a khuar a. Ka zoram pawh a tinuam hle a. Chu tlawmngaihna kan pi leh pute'n an lo chhawm nun zel ang khan mi mal tin te'n chhawm nung zel ila. 

Kan Zoram kan pi leh pute'n lu chhum bam chhum huama an sual chhuah, Zoram hmangaihtute thisen luanna hmunah ngei hi ram nuam a lo ni dawn a ni. Tiin ka chhang a ni

Phuahtu

Phuaibuang Tlangval JDa