Tleitir tuai tir hmelṭhai liam tur
Favang ral lam ni tla tur chuan a hmel ṭha tak mai chu a mawina belhchhahsak tum emaw tih tur hian a chhun paw phek a. An ṭhianho zingah chuan a sang ber lo na a, a langsar ber a, kut thawh hauh lova ka mit la-tu a ni.
A bahsam uluk taka enkawl tih hriat tak mai chu a dum mam tel siau a, niin a chhun vang ni maw a sen deuh lek lekin ka hria. A vun rawng chu favang chhum anga maia var nung sar a ni a, a heh chu zohniar kaih luh ang maiin a sen no chek a.
A taksa chuan ria lam aiin chum lam a pâwl zawk a, chu chu a inhmeh tak zet. Kan ṭhianhova kan ṭhutna thlan lung hlui tawh tak aṭang chuan mit tla lêk lovin ka en reng a, ka en a ka en nawn a, ka en ning thei chuang si lo. Amah kha hmuhnawm a tling êm a ni.
A hmel en ringawt pawh chuan thlasik ala hmang liam tlem tih a inhriat hle a, kei ai fe-in a nau tihna a nih chu.
Kan hranghlui zaithiam pu Lallianmawia Pachuau-in, “I chûn nu leh zua tal han chang thei ila” a tih leh te, Vanlalsailova'n “Tu hraileng chawi nge maw i nih le, ti ang em a ka dawn lungruk min tibuaitu ka tawng ngai lo” a tih te chu ka ngaihtuahna mawl mang takah chuan a rawn lang zut zut a.
Mahse duh viau mah ila tih theih ka nei der si lo. Amah han en hian a nun a uluk chuan pasal ṭha tak, mi langsar tak nupui a nih theih ala rinawm. Mahse kei ve hi, en thuakin ka chhe thuak a, en chet chetin ka chhe chet chet a, en rei leh ka chhe rei tihna a ni mai.
Chuti ang khawpa sakhmel chhuan tur nei lo ka nih laiin insawi theihna turin lehkha a thiam lo a, mi baka hausa lah kan ni hek lo, nitin ei khawp kan nei ṭâwk ṭâwk a ni si. Beisei viau mah ila, chu ka beiseina chu beiseina beiseiawm loh ber a ni ta ve ang.
Lo beisei tur hian tu nge ka nih chiah le tih chu tun thlenga ka inzawh ṭhin a ni. Ka inchhuan ve-na awm chhun ka thu ziak mawl mang tak a luh lum erawh insawi theihna tham a ni.
Ti chuan, chu tleirawl tuai tir hmelṭha-i kal liam tur che kei val lung mawl hian ui tak chhung leh a hmel ṭha tak hmuh leh vat châk takin ka thlir liam ta a. Aw....ka ta han ni mai se chuan ka duhthusam ve chhun chu a kim tur a.
Comments
Post a Comment