I DAM

Ziaktu: Phuaibuang Tlangval JDa

Ka chuanna bike tawt lutuk ka tlak lek lekna aṭang chuan ka chhuk a, kan khuaa dawr lian ber, Pu Joel-a dawrah chuan lutin V leh Sunday coffee mix chu ka lei a. KṬP advance Christmas-a gift exchange ami tur a ni ka lei ni, ka zûk tur emaw in lo ti ang e. Ka ṭhiante chuan hmeichhe duhzawng tur ni-a an hriat chu an lei sap sap a, an uluk em em mai leh nghal. Dar 6 a rik chuan kan biak in dar chu a ri ral ral a, kan ṭhianho pawh present kengin tlar hnung berah kan ṭhu far hlawm a. Ka present bawm siam chu a lian fu na-in V leh Sunday coffee mix chiah ka dah vang chuan ka ṭhiante'n mi nuih ṭiah ṭiah reng a, kan hruaitu chuan ṭantu a ko takah chuan kan nui lai pawh kan tawp chat a. Ṭantuin kan lam a rawn hawi chu le...awi ka nu, ava han hmelṭha tehreng em! A hmel chu ṭha vût lo mah se, a hmel a fel faiin a fresh sâr mai a, simple takin a hmelṭha a, chu chuan ka thinlung a hneh hle a, mahse a kum en reng reng pawh chuan kei ai kum 7-8 talin a upat ka ring. A din chhung zawng chuan uluk takin a lo en a, a ṭawngṭai lai pawh chuan maimit chhing lovin ka en reng a, en rei lah chuan a chhe lo ting niin ka hria. Inkhawm chhung zawng chuan ka en char char a, vawi 4 min rawn en ve a la nui zui, a nui hmel chu a chhe lo leh zual thung...Awiii heti ang em em a ka vei hi ka la tawng lo, a hmelṭha ber chu ka ti ngam lo, mahse amah aia hmelṭha zawn hi ka huphurh ber a ni thung. Chumi zan pawh chuan ka rilruah a hming pawh ka hriat lo nula chu a awm reng a, amah ngaihtuah pah chuan nui vur vur chung chuan ka muhil ta a. A tuk chu Masi a ni a, mite ta ang êm nei pha lo mah ila eirukna sum ni lo, ka nu leh pate'n rim taka an thawh chhuah sum hmanga ka thawhmaw thar neih chu ka inbel a, mahni tawkah nalh ka inti ve hlarh hlarh hle. Hman mangkhengah ka bestfriend Franky-a sawm tur chuan sam vei lama vaw thlu chuan ka chhuak a. Kal pah chuan Franky-a chu ka hmeichhe vei em em chu ka hrilh malh malh a, “a no. neih dan kan ngaihtuah ngai a nih chu” a ti a, kei chuan nei mah ila ka be ngam chuang hleinem ka ti a, “nih chuan in ni har awm” tiin ka tukah a rawn beng a, aw... ti hian lo ralkhat duh ve mai mai ila aṭ chilh lo ila tawk a ni mai tiin ka nui vur vur a, mahse at chilh loh chu thil harsa tak a ni thung. Biak in kawtah chuan kan sual rawngbawlpui ṭhin dangte pawh an lo ding mawm hlap tawh a, biak in kawt e ti lo chuan kan ṭhianho chuan zahmawh phawhraw fe fe mai sawiin kan nui kan nui a. Dar rik hnu rei lo tê-ah chuan a hming pawh ka hriat loh ka hellai rual u zawki chu a ṭhiante ni awm takte nen chuan nui var var chungin an rawn chho a, mit tla lêk lovin ka lo melh vung vung a, ka melh reng tih a hria ni ang nui sâng chung chuan min rawn melh ve a, awi awi awi ka hawi sawn rang kher mai. Kawr pawl duk a ban a pawl dal leh puan dum a laia rang thla a bih a, ava han inhmeh kher em! Ka ṭhiante chuan ka che zia chu min lo nuih kiah kiah a, ka lai chhe viau. An lut tur chu ka ṭhiante chuan ka bânah kaiin ka duh loh chung chu kan zui lut a, an hnung chiahah mi ṭhutpui a, nuam ka ti phian zui. A hriat theih tur ngei te'n ka ṭawng ring lui vel a, hui zahthlâk hian. Hun chu kal leh hretin kan ṭhianhoin-a kan nghahhleh em em mai, KṬP Sport ṭan ni chu kan thleng a, ni 1 ni chuan hmeichhiain footsal an khel a, ka hel lai rual u zawki pawh a rawn chhe lo leh viau e. Ni 3 ni-ah chu hruaitute ruahman angin Volleyball kan beng ang a, chumi hma-in mit tuama penalty pet kan ti ang. Mit tuama penalty petah chuan kan group aiawhin kei leh U Siama chu kan chhuak a, vawi 4 petin ka pet goal vek a, kan hruaitute'n JDa'n a pet thiam khawp mai an tih lai chuan ka lo nui var var a, a nawm dan a dangdai phian a kan chanpion bawk. Volleyball an ben ṭan dawn chuan ka ṭhutna lam pan chuan ka hellai rual u zawki chu a ṭhiannu nen an rawn kal a, ka lo beisei ang ngeiin ka bulah an rawn ṭhu a, kei lah ka zam chhe leh dêr tawh. Ka khup a sai dat dat a, vawt ti si lo hian ka ti ril a khur dar dar a, ka sikhlim te chu a bawl suau a nih chu. He nu mi uap natzia hi ka zo lo lam a ni. A mi uap na viau mah se a bula ṭhut chu ka tan chuan ka dam laia vanram tem ang ka ni. A ṭhiannu nen chuan an titi siam siam reng a kei chu ka ngawi rún thung. Khawiah nge maw ni U Rinhlua pawh hi a lo kal hman ni. Rei vak lovah chuan ka lam rawn hawiin “Volleyball i beng ve tum em?” a rawn ti a, kei chuan a lam ka hawi a, ka mitah tak a lo en, hawi sawn vatin, “Nimin lama ka football petnaah ka ban ka tina a, ka ben theih pawh ka ring lo” ka ti lawi rut a, ka aw ṭhinzia kha. “Awii avan zia lo ve” a ti a, kei chuan nang i beng ve tum em? Ka ti a, a ni chuan, “Awi ka beng thiam teuh lo mai, pawn aṭanga en hi ka thiam zawk” nui sâng chung chuan a ti a. Awi avan nuam tak. A hmung pawh ka zawt a, Rintluangi a ni. Haw dawn chuan a number chu tim deuh tak chungin ka dil a, ani pawh chuan min lo pe ve mai. In kha thlen chuan insil faiin ka nu rawngbawl sa chu chhim duar duarin ka ei ta ṭeuh a. U Rintluangi chu engtin nge ka biak ṭan ang aw...tiin ka inngaihtuah a, tih dan tur avan vang êm. Thleng ka sil zawh chuan len khawm hma Rinhlua te inah chuan ka leng a. A rumah lutin a lo zai rut rut a. Vawiin a ka thil tawn te chu hrilhin a tawpah chuan engtin nge ka biak ṭan ang tiin ka zawt nghal zauh a. A ni chu chhim vang vangin, a rawn men leh chuan “Hi guys ti mai rawh” a ti a, mawla tu nge chutianga hmeichhia be ngai, a aia ṭha ngaihtuah teh ka ti a, chhim leh vang vangin “Engtin nge ka nambar i neih a? Ti mai rawh” a ti leh a, huiii ka mi rawn ber lah hi rawn tlâk loh si. I mawl a mi, i rawn tlak loh si ka ti a. A ni chuan min rawn duh ka ti reng a, a ti keh hui mai a, ka rawh leng khawmnaah zuk kal tawh ila music pawh a ri tawh chu a ti a. Kei chuan thil ka hre chhuak, “leng khawmnaah i kal ve rum em?” tih chu ka va thawn a, rei lo ṭêah seen nghalin JDa em mi? Hei a hmunah ka awm tawh. Tih message chu a rawn thawn a, Rinhlua chuan “a reply che, a duh che a ni ngei ngei ang” a ti a, insiam vat la ni mai ka ti a. A insiam zawh chuan leng khawm tur chuan kan chhuak nghal a. A hmun kan thlen chuan ‘Rinin han thlir ila’ tih kha an lo sa dap dap a. Kan ṭhian duh pawh chu tlar hnung lamah kan inrawh a, ka zai si hluam hluam a, nuam tak a ni nuam tak. Ka mit mei chuan U Rintluangi chu ka zawng ru reng a, tlar hmasa ber dawt a kil lamah chuan a ṭhu a, a, a zai lai chu nui suk sukin ka en, a tuk pawh chu ava han chhe lo tak. Lengkhawm kan ṭin chuan dar 11:40 a ni tawh a, haw tuma kan in lam kan pan mêk lai chuan ka phone a rawn ri ral a, ka en vat a, U Rintluangi message a lo ni. Phur takin ka hawng a, ‘I haw tawh em? I la haw loh chuan mi rawn thlah la, ka ṭhiante hi an la leng tum a’ tih hi a ni, kei chuan rang taka reply-in khawiah nge i awm ka ti vat a, hetah zun in bulah ka awm, aw le ka rawn kal e. Ka ṭhianpa nen chuan nui vur vur chung chuan zun in bul lam chu kan pan a, kan va thlen chuan nui var var chung hian i va han fel tak a ti a, hui Rinhlua chuan nui suk chung hian eh eh eh..a ti deuh reng a. Eng chen nge cham i tum a? Tiin ka zawt a, ani chuan “ka hre lo ni 9 emaw ni 10 a ni ang” a ti a. Rei lo tê emaw ka tih chhungin U Rintluangi te in chu kan lo thleng der a. Ka duh ai kawng chu a tawi a, USA thleng pawh ke-a kal ngai dawn mah se I Rintluangi nen a nih dawn phawt chuan ka huphurh lo, ka châk ngawih ngawih zawk. Thingpui lo la in ula a ti a, Rinhlua chuan “nia ka rawn in ila” tiin luh a tum ta mai a, ni lo e, zan dangah kan la rawn in dawn nia, a tlai tawh em mai kan haw tawh phawt ang e, a ni muttui rawh. Tih pah chuan Rinhlua chu ka pawt hrâwk a, ani lah chuan “Naaaa i zei lo lutuk, khati angah te chuan in tur alawm” tiin a phun nuah nuah a, U Rintluangi chuan nui sang chung hian muttui rawh u a ti a, kan kal liam thleng chuan mi en a. Haw kawngah chuan Rinhlua nen chuan kan kuk haw ruih ruih a, kan va han mawl tak. A tûk zingah chuan kan chaw ei laihin ka pa chuan “I pu thlan saw vawiin chu a bul vel va thlo fai rawh aw i nu nen vawiin chu i pi te tlawhin kan han kan lawk ang e” a ti a, ka pi te khua hi kan khua aṭanga km 10 vela hla a ni a, a inkalpawh zung zung theih a ni. Kei chuan Masi dawn khan ka nu-in a thlo a maw ka tia ka ti a, ka pa chuan “A thlo hman loh vang alawm va thlo rawh ka tih” a ti leh nghut a, ka va han peih looo tak. Phur lo fahran chuan ka chemkawm hman thiam vei kual ngei mai chu iptêpuiah tui nen akin thlanmual lam chu ka pan ta hnak hnak a. Ka pu thlan awmna ka thlen chuan ka thil hmuh chu mak ka van ti êm. U Rintluangi chu ka pu thlan aṭang hla vak lo-a thlan awmna laih chu a lo thlo hliau hliau a, min hmuh veleh chuan “  Awi teh hlawl chuan, eng nge i rawn tih ve dawn a?” tiin mi lo be sawk sawk a. Kei chuan ka pu thlan tifai tura kal ka nih thu ka sawi chuan a ni chuan “ ka rawh inlawm ila, mi tihpui hmasa la ka rawn tihpui ve ang che” a ti a, ka hnial lo chiang kher mai. Kan thlan tihfaiah chuan Upa Ralkapthanga kum 78 thih ni 12 February 2006 tih hi a lo inziak a. I pu thlan em ni tiin ka zawt a, U Rintluangi chuan umm ka pa pu thlan a nih hi a ti a, a thih ni leh ka pian ni a inang chiah chiah a nih hi ka ti a, a ni chuan “a ni maw?” a ti a, kei chuan aw...I Pu rawn piang nawn leh ka nih hi ka ti a, a ni chuan nui var var pah hian awi i pian te chuan sikul ka lut vel tawh a, a awmzia chu ka pu ai ka upa tihna nih chu a ti a, kan nui dun kiah kiah a. Chumi ni chu rei lo ka va han ti tak êm, U Rintluangi bulah hi chuan hun hi a kal duak duak mai nih hi. Hun a liam a, kum hlui thlah zan te hmang hoin kan inbe chho zel a, kei aia upa daih zawk ni mah se a zûnah ka uai a, ka ait chilh ti ila ka sawi sual awm lo ve. Chutia inbe reng ta chu, ka duh thu ka zep zo ta lo a. Sunday a ni a, kan ṭhianhova kan leng chu U Rintluangi leh a ṭhiannu Ramtei leng chu ka hmu a, nui sâng chung hian “JD, khawnge len in tum a?” tiin min zawt a, kei chuan he kan tei kual mai mai a nih hi ka ti a. Chutah ka ding a, thaw deuh halhin, a banah ka chelh a, min rawn zui lawk teh tiin ka kai a. A ṭhiannu hnenah chuan “A nih kan kal lawk aw” a ti a, a ṭhiannu chu a bu nghat nghat a. “Khawnge min hruai i tuma” tiin min zawt a, kei chuan nui chung hian “Vanramah” ka lo ti a. Awi em em a che nui chung hian a ti a. Ka hruai tumna thlanmual bula tlaizawng kung hnuaia ṭhutna an siamah chuan ka ṭhuttir a. A mitah tak enin “ U Rintluang” ka ti a, a ni chuan ka mitah tawk lo en lêt vê-in “ Eng nge ni” a ti sap a, U Rintluang ka hmangaih che ka hmangaih lutuk che, hrilh loh hram che pawh ka lutuk, mahse rilru chu thunun tum mah ila, thinlung zawngin min thunun si, i duh loh zawng ka sawi anih chuan min ngaidam dawn nia, ka ti lawi rut a. A ni chu ngawi vang vangin mi chang tawh dawn lo emmawni ka tih hnu-ah, “JD, nang ai kum 8 laiin ka upa tih i hria em, bakah inngaizawngin lo innei ta pawh ni ila, ka taksa mawina tein chuai lam min pansan thuai ang a, nang lah i la ṭhalai viau ang a, min sit leh dawn a sin” a ti a, a ṭawng chu ring lo mah se, ka hre chiang kher mai. U Rintluang kan inkarah kum 8 lai a awm tih ka hria e, mahse hei hi hria la ka duh, kum te chu kan sawi chhuah chauhin alawm le a inthlau tih kan hriat ni, tin, i taksa mawina vanga duh che ka ni lo a, i taksa mawina avang duh che ka ni lo, taksa mawina chuan kumkhua a daih lo a, hmangaihna dik erawhin kumkhua a daih thung, chu hmangaihna dik chuan a ni ka hmangaih che ni, ka ti a. A ni chu tho thutin kan in-upat hleih lutuk a nih ka kal phawt ang tiin a kal vut a, mahse a mita mittui kha ka hmu thei. Min duh loh chhan ṭha tak a awm ka ring a, kan kum vang erawh a nih ka ring lo. Chumi ni aṭang chuan ka message reng reng a seen duh ta lo a, ka call paw'n a la duh chuang lo. Khawhar takin ka awm a, malna chu ka ṭhian neih chhun a ni a, ka ngaina lo hle bawk. Ka phone chu a khat tawkin ka en reng ṭhin a, a message a lo awm tâk hlohin tiin, mahse beiseina mai a ni. Ni khat ka rilru ipik lutuk chu ka tei chhuak mai mai a, thlanmualah ka kal a, ka rilru ipik chu a reh phah chuang lo. Ka haw dawn chuan vengthlang lam aṭangin ka haw a, U Rintluang te in ka kal pel chu kawngka a lo inkalh bar a. Ka kal leh tur chu U Rintluangi ṭhiannu U Ramtei ka tawk a, U Rintluangi hi Aizawl lamah a chhuk tawh em mi? Tiin ka zawt a, a ni chuan nimin lama an chhuk tawh thu min hrilh a, chutah chuan amah ka ngaihna kha a letin a zual niin ka hria, ka lawm e, tiin ka kalsan a. Rei vak lo ka kal tihah chuan U Ramtei chuan “JD lo ding lawk teh” tiin  mi rawn au a. Ka hawi let vat a, ka bul a rawn thlen chuan eng nge ni? Tiin ka zawt a. Ani chuan “Tei'n hrilh lo tur che-in min tia chu ka zep thei ngang lo a ni” a ti a (Tei chu U Ramtei'n U Rintluangi a koh dan a ni) kei chuan eng thil nge ka lo ti thuai a. A ni chuan “Tei'n a hnawl chhan che hi a hmangaih vang che a ni” a ti a. Kei chuan eng nge awmzia ka ti a. Ani chuan “ Ni e, a hmangaih vang che a ni, Cancer natna a vei a, a dam rei tawh dawn lo tih a hriat avangin hreh tak chungin a hnawl che a ni, a hmangaih tak zek che a, ka bula a sawi tam ber pawh nang i ni, nimin zan khan a nat zual thutin niminah an chhuk rum rum a, Doctor-te chuan thla 1 chiah a neih tawh thu an sawi a, tunah pawh i hming a lam a lam an ti asin” a ti a. Ka bing mup mup a, ka khaw hmuh chu a tawi tuk niin ka hria, U Ramtei thu sawi pawh chu engmah ka hre tawh lo. Ka hriat chin-a a vawikhat nan la biangah mittui a luang a, chu ka mittui chu ka hmangaih ber vanga luang a ni tih ka hriat avangin ka zahpui lo. In ka then chuan ka room-ah ka lut tlang a chaw ei dawnah chiah ka chhuak a. Chaw kan ei lai chuan ka pain “i Pu Rammawia lung an dawh dawn a, Aizawlah min rawn zui duh ang em?” Tiin min zawt a, kei chuan duh e ka ti vat a, khata kha phurzia mawlh kha. “Ṭhat chu, naktukah kan chhuak dawn nia” a ti a, khami lai tak khan ka pa kha ka va han mu hmelṭha tak, ka chaw ei te chu a tui sawt niin ka hria. Ti chuan kan Aizawl kal ni tur chu kan thleng a, U Rintluangi'n an veng awmna min hrilh tawh avangin amah hmuh ngêi tum chuan Pa Tea sumo a chuang chung chuan Zawlkhawpui lam chu kan pan a. Awi awi awi kawng chhiatzia chu, heng kawng chhiate hi kan ram hruaitute'n an hmuh hunah chuan hma an lak ngei ka ring, a thla ka lo la lo kha aw....pawi tak a ni. Dar 3 a ni chuan Aizawla kan chhungte ka Pu Nau, Pu Dena te inah chuan kan thleng a, Aizawl hi vawikhat mah ka la kal lo a, ka pa hnenah chuan, Pa eng vengah nge kan thlen a, tiin ka zawt a, ka pa chuan kan thlenna veng hming min hrilh chuan ka phu zawk thei hial a, a chhan chu U Rintluangi te veng a ni. Ka phone phawth vatin Aizawla awm ka ṭhianpa Rinenga chu ka call a, engkim chu chip chiar takin ka hrilh a, I Rintluangi te in zawn chhuah ka duh thu ka hrilh tel bawk a, ka rawn pei ang tiin phone a dah a. Zanriah ei kham chuan, ka leh chhuah tur thu ka pa hrilhin ka ṭhianpa Rinenga nen chuan a scooty-ah chuangin U Rintluangi te in chu kan zawng ta a, kawnga mi te chu U Rintluangi pa hming sawiin an chenna kan zawt zel a, rei fu kan zawn hnuah chuan pa tling pakhat chuan an in awmna lai chu mi hrilh a, mahse Damdawi inah an awm thu mi hrilh a, ka rilruah chuan U Rintluangi chu a rawn nghal zawk a. An awmna damdawi in kan zawh hnu chuan rang takin a sawina Damdawi in chu kan pan vat a. Damdawi in kan thlen chuan thawktute chu Nula Lalrintluangi awmna chu kanl zawr vat a, mi hrilh hnu chuan rang takin a awmna ward lam chu ka pan a, a ward-ah chuan lûtin a nu hian a lo awmpui a, ka hmel a hmuh chuan JD a ti sap a, a taksa chu a cher tawhin a dang lap a, a mi khur chu a thukin a dum kalh mai a, mahse ka mitah erawh a hmelṭhat ngaiin a la hmelṭha reng a, ka mi hmuha nula hmelṭha ber ala ni to. A bulah ṭhuin engmah sawi lovin enga ti nge min kalsan a? Ka ti a, a ni chuan nui chung hian “Mi â pa, engtin nge hetah ka awm tih i hriat a, a ti a, a biangah chuan mittui a luang ngiai ngiai bawk. A bianga mittui hruksak pah hian Pathian hnenah ka ṭawngṭai a, ka ti a. A nui sak a, “Nu hei ka sawi ṭhin JDa kha nih hi” a ti a, a nen chuan kan inchibai a. Chumi zan aṭang chuan ka riahpui ta char char a, a na a rawn chhuah chang chuan a natna chu kei zawkin tuar ila ka lo ti ṭhin, mahse tih theih ka nei si lo. Ka pu lung a dawh ni pawh chuan U Rintluangi bulah ka awm a, a ni chuan “JD pialral an tih hi a nawm i ring em?” a ti a, kei chuan “nuam piah lam a nih ka ring” ka ti a, ani chuan “ Anih chuan chutah chuan ka ta ni tawh rawh aw” a ti a, ka lam a rawn hawi a, kei chuan he khawvelah pawh hian i ta chauh ka ni tiin a hmu duk hlap mai chu ka fawp vawng vawng a. A mittui tla chu ka hruksak bawk a. Chumi zan chu ka chau ve deuh tawh bawk nen, a chhungte chuan ka duh loh chung chu haw turin min ti. A tuk zinga kal leh tur chuan ka haw ta a. Zanah chuan U Rintluangi dam theih nan chuan ka ṭawngṭai a, Pathian hnenah a nunna chelh turin ka dil a, min chhan ngei pawh ka beisei. A tûk zingah chuan chaw eikham velah damdawi in lam chu ka pan leh nghal a. Ka pa hian min hawsan tawh a, thil awmzia engkim ka hrilh a, i lo puitling ve tawh a nih hi min ti a, eng dangmahin min chhang lo. Damdawi in ka then chian Nui var varin U Rintluangi chuan min lo chhawn leh vat a, “i lo va kal hma ve ” a lo ti a, kei chuan “ Ka hmu châk tawh che lawm” nui chung hian ka ti a. Kan titi leh siam siam a, dar 2 ala ri lo deuh tihah chuan, a na chhuakin rang takin nurse-te chu ka koh vat a, rang taka rawn tlan lûtin doctor pawh a rawn lut vat a. A chhungte nen chuan ward pawnah min nawr chhuak a, ka lung phu chu a dik tlat lo, ka hlauthawng zual a. U Rintluangi hian min kalsan mai ang tih chu ka hlauh ber a ni. Darkar 2 hnuah chuan Doctor chu meng khup deuh daî chuan a rawn chhuak a, a pa te chuan pan vatin Doctor eng nge kan fanu chu a an an lo ti vat a, Doctor chuan hreh hmel tak hian “ Ka pi a pawi ka ti” a ti thawp sat a, zawi hle mah se ka bengah chuan ava ring em! A sawi awmzia chu mi â lo tan chuan a hriatthiam theih. He khawvelah hian ka hmeichhe hmangaih ber ka hmu leh tawh dawn lo. A ruang dai dal chu kuahin ka ṭap hawm hawm a, ni e ka na a ni ka na. Heti tak hian a lo nat theih a ni maw? Aw...ka hmangaih, an sawi pialralah chuan i ta chauh ka ni tawh ang tiin ka ṭap hawm hawm a. Chutah ka lu chu Volleyball hian rawn deng dawtin ka bula ṭhu chuan “Awi i na em? a rawn ti vat a” chutah ka han hawi chhuak chu kan group leh Awmbo group chuan Volleyball an lo beng a. A awmzia chu engkim kha ka ngaihtuahna vek. Ka bula ṭhu ka han en chu...ni e amah ngei a ni, hlauhthawn hmel tak hian min lo en a, eng sawi set set lo chuan ka kuah thlawp a...“i ṭha maw” mi ti a, ka kuahna chu thlahin “I DAM” kan ti ringawt a nih kha