Hmanlai leh kristian ram

Hmanlai kan han tih hi chuan kan rilruah Mizote Krisitian kan nih hma, thing bul biaa kan la mawl viau lai kha a lang ber awm e. Mahse chu kan mawl viau hunlai chu tuna Kristian ram kan intih hnu hian kan tluk chiah em le? ‘It's my life’ tih thupui a neite hian ‘dam leh tlang khatah thih leh ruam khatah’ tite kha kan tluk chiah ang em le?

Sem sem dam dam ei bil thi thi tiin, mahni thil neih ang angte mite sem ve chu damna, mahni-a pumbilh chu thihna tih nunpuitute kha Kristian intite hian kan tluk chiah em? Keini Kristian intite hi chuan ei bil dam dam sem sem thi thi tih hi kan nunpui a ni hawt e. Hman deuhva “Pu In thei kan lo aw” kan tih ṭhin te kha tunah chuan ‘chêng’ tel lo chuan kan eiin ka in thei ta lo. Engtik lai khan nge tui hi kan lo zawrh tak le?

Sum hian Kristiante hi kan mit a tidel zo ta em ni?

Mi retheite kuta chaw ṭhing pawh kan ît chuan kan laksak hreh tawh lo. Ram hmangaihtu inti, politician hrawk bawk chunga ram hmangaihtute ngei hian a ni, hêng mi retheite ham ṭhatna dawn ve chhun pawh ît a, hneh chhuh ṭhin ni. Rethei ngai kan rethei tlawk tlawk a, hausa ngai an hausak belh thur thur si.

Tunlai nula leh tlangval changkâng tak, thawmhnaw ṭha tin reng inbelte hian hmanlai nula leh tlangval bal hrip hrep kha tlawmngaihah kan tluk em? Heng nula leh tlangval changkâng tak takte hi thlan laih, hnatlan, mitthi lum men ni khuaah te hian hmuh tur awm ve se khawngtlang leh ramin hma kan va sâwn dawn êm. 

Heng man chawia kan kalna sikul building ṭha tak taka zirtirtu ṭha tak takte'n an zirtirna hmun hian hmanlai Zawlbûk, di leh dâpa sak kha a tluk lo em mi. Heng sikul ṭha tak takah hian aia upa zah, tlawmngaih, taimah leh Zo nunze mawi tinreng te kha zirtir a ni ve lo em mi? Sikula kan exam result ṭha fu si hian khawtlanga kan result erawhin pass mark pawh a pha lo lam a ni e. *Parvatui nun zilh ngai lo* an lo tih ṭhin pawh hi a awmzia kan hrethiam tawh lo ngei ang.

Hmanlaia thingfâka kawngka an do kalh mai mai paw'n ngaih ngam takin an kalsan ṭhin a, keini Kristian ram intite erawh hi chuan tala ṭha ber ber kan hman chung paw'n ngati nge kan in hi rawk a nih ṭhin le?

Ngati nge hmanlai zu tam laia zu rui buai an awm mang loh laiin Kristian ram kan intih hnu hian zu hi khap a nih chung pawhin zu ruih avang buaina siam thawm hian khawlai hi ngati nge ala luah ṭhin ni. 

Kan thu thiam pu C.Sangzuala chuan “Mizote hi kan ât lai ai khan kan a tawh zawk” a lo tih pawh kha thu dik tak a ni ta ve ang. Hmalaia kan pasalṭha, Vânapa te, Neuva te, Taitesena te, Chawngbawla, Khuangchera leh pasalṭha dangho khanin tuna keini Mizote khawsak dan hi nitin min lo en ta se, an lungawiin i ring em? Kei ni hi Mizo kan ni tih hi an awm kher ang em?

He Kristian ramah hian mi retheite rum thawm hian ram hruaitute beng a verh lo em mi ang? Nge ni a, an chhu ngawng lui zâwk? Kristianna hi thawmhnawah chauh kan hmang a ni thei ang em. Thawhlawm thawh tam leh thawh tlemte dinhmun pawh hi Kohhranah hian ava insan hleih ta êm. Hei vang hian em mi Kristian ram hian thlarau lamah hma kan sawn theih loh.

He Kristian ramah hian mi rethei zu ruite aia mi hausa ei rûk hmangte chunga hma kan lâk ngam hunah chuan Kristian ram nuam tak kan siam thei ngei ang.

Ziaktu: Jedida Darṭhangura