Hmangahna dik

              Worldometer-in a chhût danin khawvelah hian mihring 8,101,057,327 awm angin a chhût a. Mihring tlûklehdingawn tam tak karah hian “Tu nge ka nih? Eng nge ka ṭangkaina?” tiin i inzawt ve ngai em. Ṭangkaina leh hlutna nei lo ni anga inhriat châng i nei em? World Health Organization chuan ni tin mi 150,000 boral ziah angin an chhût a. Chûng zinga i tel lo ngawt pawh chu vannei intihna tham a ni. Mahse, chung zinga i tel ve loh chhan i hria em? Pathianin a hmangaih che a, amah fak leh chawimawi tûrin ala duh vang che a ni. 

              A tana tih theih kan neih tlem tehlul nen hian nang leh kei hi kan fel leh ṭhat bik vang ni lovin amah chawimawi tûrin kan nunna ala zuah tlat hian Pathian hmangaihna thûkzia leh ropuizia a va tilang chiang tak êm. Kan dam chhan hi kan hre lovang tih a hlauhawm hle mai. I nun hlui vangin emaw, i tun nun vangin emaw, in chhungkaw dinhmun emaw vangin amah fak i tim a ni thei. Mahse ani chuan dinhmun hniam bera i awm lai pawhin “Ka fa” a ti che asin. Thil awm zawng zawng siamtu leh thu neitu fa i ni tih theihnghilh ngai suh ang che. Khawvel mit hmuhah hmuhsitawm i ni pawh a ni thei, mi ropui leh zahawm i ni ve lo pawh a ni mai thei, mahse, Isaia 43:4-ah chuan “Ka ngaiha hlu tak in ni a, mi zahawm tak in ni bawk, ka hmangaih bawk che u” a ti a ni.

              Pathian chuan nang leh kei hi min hmangaih êm avangin a fapa neih chhun hrehawm tinreng, diriam leh hmuhsit, thihna hial tuar tûrin a rawn tir asin, i va'n hlu tak em. Chu hmangaihna chu hmangaihna dik a ni dawn law'm ni? Chu a hmangaihna dik tak avang chuan kan nun leh theihna zawng hi a tan kan hlan phal ve dawn lo em ni. Pathianin kan tan eng nge min tihsak tih chhût lovin, Pathian tan eng nge kan tih theih tih hian kan rilru luah reng rawh se.